Guerra testarda

Guerra testarda contra el mè dolor,
senza vittoria:
moment de pas chì e là,
vigliacca strategia
de cascià via i regord
che per on attim
par che la quietta el coeur.

On alleaa bosard: el temp,
i armi: fà finta de viv
e a tutti i costi cercà la manera
de vinc i penser
e poeu accettà, compagna de viagg,
la malinconia.

Guerra testarda contra el mè dolor,
barlumm de speranza,
on sopiment vorsuu
cont accaniment.
 

Guardà ogni tant, come proeuva de forza,
la soa fotografia,
e camminà per i strad,
comprà barlafuss,
parlà con la gent,
guardà la TV,
cascià giò medesin...

Forsi... forsi...

Dennanz a tì, ona testa grisa,
‘na camminada lenta,
i sò spall...

A tradiment, compagn d’on cecchin,
anmò ona volta, el dolor l’ha vinciuu.

1994