L'amor
 

El moeur a pocch, a pocch,
on ciccinin al dì,
domà ona gotta a nott...

Te se n’accorget nò
anca se dent de tì
quajcoss el va a inzigatt
cattiv e dispettos.

Adasi sto sciampin
el coeur el te sgrafigna,
ma l’è talment legger,
de vedess nò i freguj.

El nass e l’è inscì bell,
compagn d’on fior in butt,
d’ona sorgenta fresca
in scimma a la montagna
 

e quand el fior el sboccia,
quand el torrent l’è in pienna,
par quasi ch’el tò coeur
el sa domà sorrid.

Ma on ciccinin al dì,
domà ona gotta a nott,
l’amor el fa i sò pass
soltant a marcia-indrée

e poeu, tutt ad on tratt,
denter i oeucc de lù,
come in d’on specc di tò,
te legget la conferma.

Eppur l’era inscì bell!
Compagn d’on fior in butt,
ma l’era nò ona pianta
fiorida e semper verda.

1987