Al scior Carlo (Porta)

Come tutti i cognomm
che voeuren dì di robb,
el mè el se prestava
a famm toeu in gir, ‘na volta,

parli naturalment
de quand seri tosetta
e me ciamaven “Uscio”
a scola, i mè compagn.

Allora m’inrabivi
anca col mè papà,
el conossevi nò
l’illustre antenaa,

savevi nanca dì
‘na parolla in dialett
e adess mì leggi e scrivi
in milanes corret.
 

A dì la verità,
soo nò se son parenta
de tì, gran Carlo Porta,
nassuu duu secol fà,

ma adess sont orgogliosa
de sto cognomm che gh’hoo
e voraria, on ciccin,
quand scrivi, somigliatt.

Soo nò, forsi, chissà?
Però in del tò ritratt,
ritroeuvi i lineament
ch’eren del mè papà.