Ancamò 'na guerra

La sa, sciora Maria,
che gh’è s’cioppaa la guerra?
Se l’è che la me cunta?
Ma contra L’Inghilterra?

Macchè, l’è contra on “Marco”,
me par ch’el sia todesch
e parlen de manovra
e disen che stemm fresch!

Hoo sentii dì che devom
denuncià tutt i “Bot”.
Mì me regordi pù
quanti ne hoo ciappaa sù.

Aumenterann i prezzi,
bisogna fà di scort,
l’ha dit el mè vesin,
cert el gh’ha minga tort!

Ma, la me disa lee,
come se fà a comprà,
se mì gh’hoo nò i danée,
che invece lù el gh’ha?

Devom pagà di tass
anca nun pensionaa:
sto “Marco” el va sù e giò,
bisogna risparmià!
 

Nun podom nanca dì
“Paghi nò, voo in preson”
perchè quell che lor voeuren,
l’è già in de la pension.

Se quei che gh’hann la barca
o on’aoto de gran marca
deven pagà pussée,
ciapegh i sò danée.

E mì che son poeretta
e pensavi, a Natal,
de toeugh ona barchetta
cont i moll, per regal

al mè ultim neodin,
ghe la farò de carta,
inscì el giugarà
con l’acqua in del cadin.

Hoo anca sentii dì
che l’ann che venn, però,
aumenten i pension
segond de l’inflazion

Forse capissi pocch,
ma la television
la dis che semm a tocch,
però gh’è nò inflazion!

E la moral, se sa,
el Marco el fa la guerra
e hinn propi i pensionaa
a veggh el “cu” per terra!