Come ona robba

T’hann ciamada Fiorella,
on fior nassuu nel negher
la prima nott de l’ann

E t’hann salvada
in de la nott gelada
senza ’na stella.

L’è staa giust fà vedè
el tò nasin schisciaa,
la toa voeuja de viv,

chè la poda vedè,
che la deva patì,
tutta la vitta... lee.

Ma vialter, adess,
strascee i fotografii,
brusee tuscoss d’incoeu

perchè quel fior sbocciaa
in mezz a del letamm
la vorarà savè,

giusta coriosità,
speranza in d’on quajcoss;
la gh’abbia minga i proeuv

La poda cred de vess
nassuda, come nun,
nel venter d’ona mader.