De là del cancell

Anmò hoo vorsuu vedett,
scesa de cipress
de la mia cà in Toscana.

Hoo vorsuu fà
la proeuva del coeur,
ma, de là del cancell,
hoo minga vardaa.

Se ‘l regord l’è tropp ciar,
el diventa nemis:
nient, nanca ona rosa,
nissun, nanca ona vos.

Sdoppiada in dò person,
voeuna col coeur a tocch,
l’altra pussée spavalda...

Istess el sô d’agost,
hoo nò scoltaa i zigaj,
la radio la quattava
la musica d’on temp.
 

Forsi la paura
de ninnà pù regord?
Oppur de sforbisad
de nostalgia in del coeur?

Domà i regord hinn mè,
in del giardin, nagott,
nanca on fasoeu de l’ort,
‘na sdraio apôs del mur.

Podevi nò robà
con l’anima e col coeur
quell che gh’è restaa
de là de quella scesa,
de là de quel cancell
rovent al sô d’agost.