El dialett milanes

Mi son nassuda a Porta Romana,
poeu semm andaa a stà de cà a San Luis,
e là, in di praa de la Via Calabiana,
giugavi semper coi mas’c, i mè amis.

Lor, i mè gent, parlaven el dialett,
robba, chissa perchè, a nun vietada:
dato che serom di tosanett,
inscì dovevom veggh ‘n’altra parlada

E anca a vint ann, quand mì me son sposada,
dato ch’l mè marì l’ era on toscano,
coi vocaj strett, la “c” aspirada,
parlavi semper domà in italiano.

Quand semm vegnuu de cà a la Baronna,
in sul Navili, Porta Ticines,
seri davvera propi minga bonna,
de dilla, ‘na parolla in milanes!
 

El me piaseva sto bel dialett,
ma in di negozzi e poeu anca in sul tramm,
quell ch’ el va in piazza, tutt pien de falchett,
tutti terroni, cont el sò italian.

Ma poeu hoo troaa on cantonin de città,
l’è Canottieri Milano el sò nomm,
e tanti amis, quasi tucc pensionaa
che parlen tucc el dialett del mè domm.

E finalment mì te senti ancamò,
musica dolza, inscì dolza ai mè orecc,
che te me parlet d’on temp che l’è andaa,
quand la sentivi parlà dì mè vecc,

perchè in sto post, col dialett de Milan,
tucc quej di bocc, de la “scopa”, del “duu”
lor m’hann offert tucc insema ona man,
perfina el Reina, che adess el gh’è pù