La nostra squadra, ogni quindes dì,
la giuga in cà, al stadi de San Sir;
insema col mè amor, mi voo a fà el tifo
tutta festosa, compagn d’on “trelir”

In de l’andada, ier, emm tacca a lit
e mì pensavi “L’è propi finida !”
I gamb tremaven e seri sudada,
on gran magon in la gola sarada.

Oh! ‘me l’è brutt, se te voeuret vess sola,
troass invece in mezz a la gent:
te voeuret piang, però te gh’hee vergogna
e te se sentet mal, col gropp in gola.

Avanti e indrée, compagn de quel ballon,
sù e giò l’andava anca el mè magon,
e dent de mì pensavi “Se adess piangi,
la disarà la gent, che mì son matta”
 

Dovevi troà ‘na scusa, voeuna bonna,
per podé mettom adrée a caragnà
e finalment mì l’hoo propi troada:
o voeuna o l’altra doveven segnà !

In ogni caso mì podevi piang
segond la mìa bella soluzion:
segnava l’Inter, per felicità
segnava l’altra, per disperazion!

Ma el mè magon m’el son portada a cà
perchè, pensì, colmo de la scarogna,
tira de chì e poeu tira de là,
ier, zero a zero, hann domà pareggiaa!