El pan

Prestinée, l’è cott el pan?
Me dispias, l’è tutt brusaa!
Prestinée, ma chì l’è staa?...

... El girotondo a trì ann,
la filastrocca d’on temp,
ona canzon per amà
el pan, tenendos per man.

E quand vorevi mangià
domà pitanza e nò pan,
data la poca abbondanza,
mamma e papà me diseven
“Tosa, per bonna creanza,
tì te devet compesà!”

Seri ancamò ona tosetta
quand l’è s’cioppada la guerra:
insema coi pomm de terra,
negher, el pan de mangià.

E forsi, propi in quej dì,
dì de paura e de fam,
mì hoo imparaa dent de mì,
a voreggh ben al bon pan.

Dess, quand mì senti el profumm,
la deliziosa fragranza
del pan appena sfornaa,
anca in sti temp de consumm,
anca se gh’è l’abbondanza,
giuri, me pias compesà.