El pulmann special

Parlà di funeraj l’è minga bell,
‘na robba insomma de fatt magonà,
ma a mì ‘l me s’cioppa foeura del cervell
on cert penser magari strambalaa.

Voeuri parlà del pullmann di parent,
minga quej strett, però, quej de lontan,
che se ritroeuven domà in sti moment
e, per fortuna, a distanza de ann.

Se setten giò ancamò on poo commoss,
prima in silenzi, quell de circostanza,
poeu, tutt a on tratt, toeu, parlen de tusscoss
come s’hinn drée a partì per ‘na vacanza.

“Chissà me l’è cressuda la Lucia!
El tò nevod, davvera l’è soldaa?
Te se regordet de la compagnia,
quand tucc insema andavom a ballà?”

A pocch a pocch, el pullmann silenzios,
el pullmann di parent, minga quej strett,
a pocch a pocch el s’impieniss de vos,
l’è quasi ona certezza el mè sospett,

perchè in di vos gh’è nò malinconia,
ma anzi, senza vess esagerada,
mì senti quasi ona certa legria,
naturalment on ciccin mascherada.

E poeu capissi, ma l’è natural!
Dess l’hoo troada la mia verità:
el pullmann di parent l’è quell special,
doe tucc se senten di privilegiaa!