El visorin del dopmezzdì

Forsi i proverbi gh’hann semper reson?
Se podaria fà on studi per savell,
per ogni regola gh’è on’eccezion
e ogni testa la gh’ha el sò cervell.

Ma gh’è on proverbi, per mì, tutt sbagliaa,
pretendi nò che tucc pensen istess,
l’è quell ch’el dis che dormì l’è peccaa,
che se te dormet, te ciappet nò i pess.

El m’è vegnuu in ment domà l’alter dì
e allora dò paroll per celebrà
el visorin ch’el se fà el dopmezzdì,
podè dormì subit dopo mangiaa.

Siccome per viv ben l’è necessari
savè apprezzà i bej robb de la vitta
anca de pocch, minga quej straordinari,
mì me permetti de davv ona “dritta”.
 

Proeuva a gustà quell’attim incantaa,
quel visorin ch’el porta in paradis,
lassa che i alter vaghen a pescà,
pensa al proverbi e faggh on sorris,

l’è quand, in del lett oppur sul divan,
anca se poeu te venn el mal de coo,
indeperlee la parla la TV
e tì te se indormentet pian apian.

L’è el visorin, l’è quell del dopmezzdì,
ciamaa de quej de Roma “pennichella”
che in quel moment el te poeu fà capì
che in fin di cunt, questa vitta l’è bella.