El vott de marz di omen

El vott de marz, riva la mimosa
e sti por omen me fan quasi penna,
col mazzolin in man per la soa sposa
che l’è, per lor, magari ona cadenna!

El vott de marz, giornata de protesta
per ona libertà ch’emm conquistada,
(almen nun credomm) donca se fà festa
perchè sto dì l’è la nostra giornada.

I omen ne varden, hinn quasi content
se tornomm tardi stassera, in la cà,
perchè stassera, anca lor, finalment
almen se goden la soa libertà.

I mè paroll, avarii capii giamò,
voeuren nò vess ‘na rivendicazion:
de “par condicio” mì ne parli nò,
me metti nanca a dì di parolon!

El vott de marz, la festa de la donna,
e per on dì, i omett stann lì a vardà,
on poo invidios, ma stravaccaa in poltronna,
a domandass perchè hinn nò festeggiaa.

E adess, mì soo giamò, sti pori nan,
se spetten che mì disa, in verità,
che la soa festa la dura tutt l’ann
e invece l’è, che vann nò festeggiaa!