...Four... three... two... one!

Lassù in ciel, in l’orbital stazion
ciamada Mir, i Russi hinn lì a spettà
i American ch’hinn diventaa amison
e con l’Atlantis, “ranpin” se farà.

L’è pront el “shuttle” giamò su la rampa,
ma gh’è prevista tempesta de sabbia,
disen la radio, la TV e la stampa
e quij là spetten, chissà con che rabbia!

L’è lì l’Atlantis, grand ‘me un grattaciel
e finalment doman el partirà,
dopo la sabbia e de grandin el gel,
ecco, a l’invers, el cunt se farà.

El gh’ha on motor che l’è ona perfezion,
disen i tecnich che l’hann collaudaa;
vedell partì la sarà on’emozion
e anca quand la Mir el “ranpinarà”.

Ma in de la nott silenziosa on romor,
on strano “tocch, tocch” ch’el dà de pensà,
el riva del razzo, gh’è minga error!
Doman mattina, se succederà?

Scienziaa e tecnich, col nas all’insù,
inebetii e tucc meravigliaa,
varden el razzo ch’el var on “perù”:
l’è tutt perfett, ma l’è tutt sbusattaa.
 

Si, duu osellitt, duu picch, marì e miée
hann faa succed ona robba fantastica:
cont i sò becch hann faa quel gibillée:
centrenta bus hann faa in della plastica.

Cerchen on mezzo tutti quij scienziaa,
pesten pignatt e poeu sonen trombett,
ma, cara la mia gent, gh’è nient de fà,
quij là segutten, chì e là su i sciampett.

L’è donca rimandada la partenza,
là su la Mir capissen pù nagott
“Possibil che on osell, contra la scienza,
el poda vinc e fà sto rebelott?”

Eppur l’è inscì, l’è ona robba de matt,
quanti danée spenduu per mandall sù!
E adess l’è lì, compagn d’on scolapiatt,
‘na pianta eccezzional, lor l’hann creduu.

Stii nò in penser, però, perchè hinn riessii
a portà giò quij Russi dopo on mes,
e par che lor, dopo, s’hinn divertii,
cuntand sta bella storia al sò paes!