La bici gialda

De tanto temp disevi al mè papà
che vorevi la bicicletta gialda
e lù el me rispondeva de spetta,
Appena el mè padron i cunt el salda!”

Però sta bici la rivava mai
e mì avevi miss giò quasi el petitt;
on dì el mè papà el legg i giornaj,
poeu el ghe dis a la mamma se gh’è scritt.

E finalment domenica mezzdì
el riva con la bici gialda noeuva:
stoo pù in la pell, son drée quasi a svenì
e voo giò in del cortil a fà la proeuva.

Lù el me raccomanda “Varda Gioann,
de andà minga de foeura del cortil,
ringrazia el ciel e el sindich de Milan”
Mì, del sò discors, no capissi el fil.

El fatto l’è che dopo ona quaj ora,
el mè papà,con la vernis marron,
el pennel e la bici el va dessora
e mì sto lì a guardall cont el magon.

Ancamò adess son chì come on baggian
a domandamm “Perchè l’ha pitturada?
L’era inscì bella prima, porco can,
gialda m’el sindich me l’aveva dada!”