La bosia

‘Na muccia de parer su la bosia,
ognun la pensa a la soa manera:
gh’è quell ch’el dis che ghe voeur fantasia,
e invece chi sostegn che l’è nò vera.

Per dì bosii bisogna veggh memoria
e, regordass tuscoss, l’è ona fadiga,
inscì, quand vun l’inventa la soa storia,
attenti che l’è facil ch’el scarliga.

L’è forsi pussée facil vess sincer
e dì la verità in ogni occasion,
savé manifestà el tò penser,
oppur, col coeur in man, la toa emozion.

Ma in de la vitta hoo anca imparaa
che ogni impostor el cred propi a nient
e me domandi “Ma che gust el gh’ha,
a viv coi alter inscì malament?”

Siccome gh’è l’invers in di medaj,
quej ch’hinn sincer, creden propi a tusscoss,
vegnen faa sù come tant remissej
e in de la vitta se fan mai i oss.
 

“Al lupo, al lupo!” el vosava el pastor,
tutti correven, ma l’era minga vera
e inscì l’è finii mal quell’impostor...”
el mè papà “Te devett vess sincera!”

El me cuntava semper la storiella,
el m’ha insegnaa a mai dì ‘na bosia,
però, ogni tant, la ment la se ribella,
chè, inscì, sopporti pù l’ipocrisia.

e tucc i volt ch’el diaol el fà i pignatt
senza coverc e l’è ona delusion,
senti in del coeur on negher de scorbatt
e tanta rabbia mes’ciada al magon.

Podaria fà on romanz su la bosia
e fà la distinzion fra quand l’è “balla”,
quand l’è pietosa e donca necessaria
e quand l’è falsità e ipocrisia.

Ma, colorì el discors, l’è ona bosia?
La ment la se confond, voo drée a pensà,
eppur mì son convinta, in fede mia,
che semper vinciarà la verità.