La cartomante

Quatter pian d’ona scala voncia e scura,
odor de broccol fin su la ringhera
e te ve sù col coeur pien de paura,
fin che te rivet dent ona rattera.

T’hann dii che questa chì l’e propi brava,
che la induina senza mai sbaglià:
rivaa con l’aotomobil che rombava,
el portinar l’ha vist on letteraa.

E poeu te ve denter on busegatter
tutt tappezzaa de Madonn e santitt,
e lì gh’è on’atmosfera de magia:
i cart, la sfera e anca trì lumitt.

Te spettet el tò torno in compagnia
de gent ch’hinn disperaa compagn de tì,
ognun col sò dolor e la manìa
de sentiss dì che vegnarann bei dì.

La maga bionda, tutta ossigenada,
la mes’cia i cart, la guarda in de la sfera
e tì te spettet come on’assedada,
che la te disa la parolla “Spera!”

Te vegnet foeura pussée sollevada,
ma la te ciappa la disperazion
quand te capisset che te set andada,
per veggh appena on attim d’illusion.