El tò patì l’ha scancellaa tusscoss,
risentiment, proposit de vendetta.
De tì vorevi almen ‘na quaj parolla,
o on sorris, a carezzam el coeur.

I noster pass divis, des ann de strada,
te camminavet nò insema a mì.
Contra ogni logica, inscì me pareva,
arent a tì hoo camminaa testarda.

Dess che voo drée a spià el tò respir,
dess che on tò colp de toss el me pugnala,
dess che voraria datt el mè fiaa,
per aiutatt a calmà i patiment,

l’è quasi dolza la disperazion,
perchè la strada fada rent a tì,
dess hoo capii, inutil l’era nò:
l’è bell avé capii de vorett ben!

Forsi l’è falsa sta “felicità”
come ona maschera de carneval,
ma, come a on legn in la pienna d’on fiumm,
ghe metti addoss i sgriff a sta certezza.


                                             1993 / 7 Novembre