La collanina

In mezz ai barlafuss e ai berlinghitt
che tegni separaa dai gioj quej ver,
m’è capitaa de cattà foeura ier,
‘na collanina bianca de perlitt

L’hoo missa al coll inscì senza pensà
che l’era la collana de la mamma,
ma hoo cominciaa a sentì come ona fiamma
de contentezza e de serenità

Poeu hoo capii perchè seri cambiada:
la collanina l’era on talismann
ch’el me faseva tornà indrée lontan
anmò in ona stagion ormai passada

‘Na veggia foto d’ona bella sposa,
i oggioni scur pien de felicità,
el vestii rosa, volant in tafftà
e, al coll, sta collanina, nò preziosa.
 

E poeu me la regordi i ultim ann
su la toa pell dal temp ormai slisada:
pussée giald, i perlitt, on poo ruinada...
i tò cinqu fioeu, duu mas’c e trè tosann...

Mì la carezzi e inscì te parli insema
sgrani on rosari. ma senza pregà:
cinqu fioeu, la guerra, el tò marì soldaa,
indepertì con tutt i tò problema...

Ogni perlina, on granin de rosari...
“Signor, protegg i mè fioeu, el mè marì!
Signor, fa che finissa ‘sto calvari,
mi voo nò in gesa, mì te preghi inscì!”

Dess, sul mè coll dal temp quasi slisaa,
porti la collanina d’ona sposa,
la var nagott, ma l’è per mì, preziosa
e la me jutta a viv e a regordà.