La mia Ciquita

Hoo donca vist incoeu el puresin,
el puresin famos perché "virtual",
'penna nassuu dent in d'on scatolin:
on pontin negher con do piccol al.

Per fall stà ben, te schiscett on botton,
col scatolin in man per tutt el dì:
par ch'el te daga ona quaj emozion
e on gran dolor se t'el vedet morì.

Sarà che per sti robb son troppa veggia,
a mì me piasen i animaj ch'hinn viv,
col "virtual" voo foeura de careggia,
me pias l'immaginari al positiv.

Ma el puresin virtual el m'è servii
A tornà indrée de tanti, tanti ann…
e guerra e famm in del quarantatrì,
on puresin in la cà de Milan.

On poo cressuu, quasi 'na pollastrella
e a man, a man, gaina diventada:
ona gaina rossa propi bella,
nun tosanett, Ciquita l'emm ciamada.

L'è tropp lontan el temp, regordi nò
se la faseva i oeuv, la mia Ciquita,
la vedi in sul poggioeu o sul comò,
tutta cocciada con la testa dritta.

"Coccodè" la ghe sentiva rivà,
se la ciamavom, lee la rispondeva,
quel puresin che l'era staa compraa
perché la famm, allora, l'era greva

Naturalment poeu l'emm minga mangiaa
Quel puresin diventaa poeu Ciquita,
minga "virtual", ma viv, de vess amaa
che incoeu mì hoo regordaa dopo ona vitta.