La mia primavera

E l’è s’cioppada a on tratt, la primavera!
Inutil sta a descriv i sò color,
l’hann faa da semper poetta e pittor:
incoeu, al mercaa, hoo sentii che la gh’era.

El sô el rivava intramezz i tendon,
de sora i bancarej pien de legria,
se sbuttonavom, ma con cortesia,
in d’on via-vai pien de confusion.

E tucc i facc me pareven content:
eren sorris o immaginazion?
Grand el diventa el coeur, per l’emozion
de noeuva primavera, finalment!

E voeuja de cantà d’amor canzon,
per i mè gent, i mè gatt, i mè amis,
in sta giornada che la me dà sfris
de contentezza e de commozion.

Rivada a cà, hoo interraa i mè piantin
in del mè ort, sul poggioeu, in cusinna:
seller, basilich, salvia, rosmarin,
perchè l’è primavera, stamattina!

Analizzand penser e sensazion,
qual era la mia gioia, hoo infin capii.
Seri felice, a on tratt, dent in de mì,
per la gran gioia de savè gioì.
                                           

                                        Marzo 1997