Eren giamò cinqu’ann che inscì per mì
de nott vardavi la television:
l’era la “ninna nanna” per dormì,
on quaj sorris e tanti bei magon

E finalment in lett seromm in duu,
allora sul comò, TV a color;
sognavi de guardalla brasciaa sù
e poeu la “buonanotte” del mé amor

El fatto l’è che dopo ‘na quaj nott
l’ha vorsuu lù el post pussée vesin,
mì dedrée i sò spall a vedé nagott,
oppur stà rampegada in sul cossin.

L’è tanto temp che mì rampeghi pù,
me par de vess in lett dedrée d’on mur,
e tacca e smorza, la ved domà lù,
scolti e i sò spall hinn tucc i mé figur.

Gh’è la TV e inscì nanca on basin,
dedrée i sò spall, però, a gh’é de bon,
la riva, ‘me dedrée d’on cardenzin,
la musica di mobil d’Aiazzon!

1984