La pigotta
 

Giugavi cont i mas’c a fà la guerra,
giò per el rivon de la ferrovia,
el scossarin a quadrett vonc de terra,
ona vosada de la mamma e via!

La me diseva “Giuga coi pigott,
impara a fà la mamma coi bambocc!”
I sò paroll serviven on nagott:
giò per la strada a spaccam i genocc!

Ogni ann, sotta l’alber de Natal,
troavi ‘na pigotta tutta mia
ghe fasevi ona festa eccezional
ma dopo on quaj dì, la mettevi via.

De porcellana l’era, oppur de pezza,
on bambocc in la cunna, perlopù,
col “ciuccio”, el bauscin, che tenerezza!
E tutt a on tratt, mì la vorevi pù.
 

Forsi de allora el savevi giamò
d’abituam nò coi pigott a giugà,
che mai el saria staa mè on bel popò,
de stringiumell al coeur e de ninnà,

perchè la vitta l’è minga on bel gioeugh:
de piscininna se giuga a la mamma
e inscì, dent el tò coeur, se pissa on foeugh
che adasi, adasi el diventa fiamma

e se de granda el gioeugh el finiss
perchè te gh’hee domà pigott de pezza,
e dent i tò oeucc on quajcoss sberlusiss,
suga i tò lacrim, faggh ona carezza.