L'ultim fiocch
 

Al dì d’incoeu, minga tucc, per fortuna,
parecchi nonni, per vess gioin anmò,
al sò nevod, anmò dent in la cunna,
ghe disen “Mi son Gigi, oh bel popò!”

El piscinin el cress senza savè
quell ch’el voeur dì veggh ona vera nonna,
voeuna la riva in truscia dopo el tè
e lù el ghe dis “Ciao, Rosi!” a la biondonna.

Mì son la pussée granda de cinqu fioeu,
l’è nassuu l’ultim, gh’avevi el moros.
Quarant’ann hinn passaa, me par incoeu
quel dì d’ottober cont on ciel nebbios

L’ultim di mè fradei l’è staa el mè fioeu,
tanti sberlott gh’hoo daa per el latin,
lù l’era taccaa a mì come on cagnoeu
e anca de grand, gh’hoo mollaa on quaj pappin.

E tutti e cinqu poeu nun se semm sposaa,
de ses neod son diventada zia,
‘na zia on poo matta, voeuja de giugà
ma senza avegh ona creatura mia.
 

E adess gh’è finalment nassuu on rattin,
l’è el fioeu del mè fradell: fradell o fioeu?
E mì saria la zia de ‘sto nannin
ch’el me sorrid giamò coi oeucc legrioeu.

L’è rivaa adess ch’hinn bianch i mè cavej
gh’è pù l’invidia perchè minga mè:
son la soa nonna, car i mè fradei,
pur se vialter capii nò el perchè.

Fasev ciamà per nomm, nonni d’incoeu,
mì vedi domà l’ora che lù el parla;
ve poden dì, i nevod, “Tommas” o “Carla”
“Mamma, papà” l’hann dit i voster fioeu.

Mì giuri che son minga de sbatt via,
ghe foo la ninna nanna a temp de rocch,
ma voeuri nò che lù el me ciama “zia”:
Nonna l’è d’ona vitta l’ultim fiocch.