Marz 1993

Insema emm vosaa a la vittoria,
insema l’allor emm divis,
savevom ch’el gh’era dovuu
dopo secol de schiavitù.

E slogan a on tratt s’cioppaa foeura
e poeu verità on poo nascost,
vosaa finalment a gran vos...
E donca, s’ceppada la cros?

“Lor” eren on poo sbalordii,
quajvun el pareva convint,
però i battiman che gh’hann faa
domà di bosii e finzion

domà “bla, bla”, tanti paroll
magari on quaj convinciment,
ma ognuna de nun l’ha piangiuu
el personal, sò falliment.
 

Oh mader d’incoeu, gioin mader,
al mas’c e la tosa insegnée
con la vostra noeuva passion,
identica, l’educazion!

Inscì savarann ch’hinn istess
d’on omm e ona donna, i diritt,
inscì spartirann i dover,
man in la man, sul stess senter.

E dent in di pagin d’on liber
i donn de doman troarann
lusent e anmò verd come incoeu,
i foeuj de l’allor miss de nun.

S’ceppada per semper la cros,
brasciaa sù con lor ch’hinn amis
ringraziarann la nostra storia
e allora, finalment, ...VITTORIA!