Nostalgia bosarda

Quand mì sentivi i vecc, con nostalgia,
parlà de la carrozza col brumista,
oppur de l’ombrellée, giò in della via,
quand el vosava “Oh, donn, gh’è chì el Battista!”

e quand diseven con malinconia
che l’organett stonaa con la scimbietta
el vareva per lor tanta allegria,
coi fiolettitt adrée con la trombetta,

seri sicura che gh’even reson,
ch’eren convint, quand parlaven inscì:
dent in del tramm, saraa sù ‘me in preson
e senza tutti i robb che prima hoo dii.

Adess però hoo capii la verità,
dess che anca mì senti nostalgia
de tanti robb d’on temp che l’è passaa
e come on lader, j ha portaa tucc via;

la ciami, adess,” bosarda nostalgia”,
perchè quell che rimpiangi, oh, mè tosann,
hinn minga i robb ch’el temp l’ha portaa via:
ma l’è la nostalgia di mè vint’ann.