On titol sbagliaa

Lì sotta a on pont del Navili, on barbon
el desfa giò on scartoss faa de giornal:
ona maietta, trì o quatter bombon
“Incoeu se mangia - el dis - Meno mal!”

Con la maietta a fà de cossin
come el fudess in d’on lett stravaccaa,
“Dess che hoo mangiaa - el dis - leggi on ciccin
de sto giornal che l’è tutt resciaa.

El legg on titol, el resta de sass
“Milan ladrona” lì gh’è scritt in gross;
ghe trema el coeur, el gh’ha come on sconquass
ch’el se sparpaja per tutti i sò oss

e con la man tutta magra e nodosa,
el lissa el foeuj per leggell pussée ben:
gh’è ona parolla per lù misteriosa
che la impieniss el sò coeur de velen

El capiss nò la parolla “tangent”,
per lù l’è noeuva, porca la Martinna,
però el capiss che certi delinquent
hann faa i danée roband a la Baggina.
 

Quand el capiss cosa voeur dì “tangent”,
el pensa con la soa filosofia
che i pover semper hann pagaa a i potent
ogni piasè, sia pur per cortesia.

Ma l’è quel titol che le fà inrabì:
i Milanes hinn minga farabutt,
l’è gent che la laora tutt el dì
cont onestà, dal padron al magutt

L’è giust che paghen tutti i delinquent,
l’è giust che borlen giò de la poltronna
tucc quej che s’hinn faa scior cont i tangent,
ma ciamé nò Milan ona ladronna.

E del giornal, lù ne fà ona balletta,
la tira in l’acqua che va lentament,
intanta el pensa che, essend in bolletta,
mai ghe domandarann ona tangent.