Te porti mai on fior al cimiteri,
ciappada da i mè robb de tutt i dì
e da sta vitta, gran triboleri,
che la me lassa nanca pensà a tì.

Me par, a volt, de vess senza memoria,
de regordamm nagott del temp passaa
insema, in ona troppa curta storia
che voraria invece regordà.

Sì, ogni tant, ‘na quaj fotografia
la me regorda doe serom d’estaa,
insema con la mamma e con la zia,
a camminà content in mezz ai pràa

oppur me ven in ment on quaj Natal
e, come ona lusnada in tutt sto negher,
el mè papà, davvera eccezional,
stracch ‘me on villan, ma per nun alegher.

Ma on gran magon m’è s’cioppaa foeura incoeu,
perchè hoo sentii “Torna piccina mia,
torna dal tuo papà...”
che trasmetteven in television

Incoeu tutti i regord hinn ritornaa,
insema a mì hinn staa per tutt el dì:
de piscininna, in scossa al mè papà,
ch’el me cantava ‘sta canzon per mì.

E allora, incoeu, papà, col mè magon,
l’è staa davvera ‘me portat on fior;
ripetevi i paroll de la canzon,
intanta el coeur el piangeva d’amor