Parlà de Milan

Milan, cont el sò domm, el sò Navili,
metropoli de sciori e de barbon,
cont on “via vai” de tramm e d’autobus,
tutti de corsa per no perd el temp...

Questi hinn i solitt robb semper sentii:
la vera capital, el coeur in man,
tutti che vann de truscia col fiadon
e che se fermen mai, bella Milan...

Ma i mè quatter paroll je sbatti giò
per quella gent vegnuda de lontan,
ognun col sò dialett inscì divers,
tanto difficil per nun Ambrosian.

Voeuri parlà de quej minga nassuu
in sta città, la pussée bella al mond
ch’hinn vegnuu sù del tacc del nost stival,
oppur ch’hinn borlonaa giò da i montagn.
 

L’è vera nò che se senten sperduu,
che vorarien tornà al sò paes,
perchè j emm faa sentì noster compagn,
mì giuri che se senten Milanes.

Hann imparaa perfina el nost dialett,
hann casciaa via dal coeur el sò magon
a viv in sta città che la te ciappa
col sò frecass ch’el diventa canzon.

In fin di cunt, gh’è nient de bell pussée
de vun del tacch ch’el dis “Va a dà via i ciapp!”
oppur on Marocchin in del metrò
ch’el dis “Vu’ comprà per pocch danée?”