Per la verdura se va in de l'ortolan

Prima on “crich crach” ch’el te fa el coeur smort,
e de brusaa on odor el riva fin chì...
derva el poggioeu, anca se dent de tì,
te see giamò che brusen i ort.

Oh! Quanti fiamm in tutti i ort del Navili,
gh’è nanca on vecc ch’el salva el sò verzer,
nissun che corr, nissun ciama i pompier:
stann tutti rintanaa come conili.

E poeu, el dì dopo, gh’è on alter romor,
quell de la ruspa che la va innanz e indrée;
nissun che varda, lì in sul marciapée,
domà per tì quel strazzi, per trè or.

E adess gh’è pù nagott, domà el terren
ormai spianaa, compagn d’on bel biliard:
t’hann dii che l’ha vorsuu vun coi miliard
per fà di camp de tennis nientemen

La terra rossa la riva doman
per quej ch’hinn sciori e compren la verdura
e giugaran per fà bella figura
per l’insalata... via, gh’è l’ortolan!

Ma lor ciapaven l’acqua con amor
a secc a secc, tant’acqua in del Navili
e l’erborin per i sò mondeghili
adess, el gh’avarà ‘n alter savor.