La ment la scolta penser scombinaa,
alter consili bombarden i orecc,
la toa tristezza la ven ripagada
cont el confort, come merce de scambi.

Ma quand, tutt a on tratt, el coeur el se slarga
per penna on attim de felicità,
difficil e inutil ogni parolla
ch’el coeur el detta e la ment la refuda.

Perchè la gioia la interessa nò?
El par on controsens, ma l’è provaa:
domà el dolor el poeu vess scoltaa,
con tutta la possibil comprension.

Inscì la voeuja de scriv la te inziga,
la premm sul tò coeur ormai prepotenta,
l’è la toa penna, strument de la vitta,
per podé regordà l’ormai passaa.

Come on fior secch in di pagin d’on liber,
i tò paroll resterann a memoria
d’on bel moment volaa via in d’on moment,
giamò passaa come el vol d’ona rondin.

E inscì el tò brindisi senza invidaa,
per ona gioia che l’è domà toa
el sarà minga staa faa solament
d’acqua d’on fiumm che la corr e la va.