Pover pensionaa

El quindes de gennar spettavi la pension
(poca ma regolar) cont on poo d’emozion,
perchè m’aveven dii, per radio e poeu la gent,
che forsi anca per mì ghe saria staa on aument.

Ma son restada lì, compagn d’on ziffolott,
quand in banca m’hann dii che gh’era on bel nagott;
hoo pensaa dent de mì “Beh, ghe sarà on ritard,
dovuu al scompartì de tutti quej miliard.”

Ancamò fiduciosa, tacchi a telefonà
via Lampedusa, all’INPS e a i sò impiegaa
“Signora, provi in Melchiorre Gioia,
ci lasci lavorare e non dia noia!”

In la cornetta ...to...to... occupaa,
o ‘na musichetta che la te fa inversà.
Ciappi la linea on dì e pensi “Meno male!”
“Signora, lei non c’è sul terminale!”

el me rispond noiaa, vun che per compassion,
l’ha faa el sforz de scoltà sta bella situazion
“Si rechi a un’altra sede, in Missori, magari,
telefoni, se crede, ma nei giusti orari!”

Mì, stufa de spettà, finalment hoo decis
e sont andada là, per quajcoss de precis
“Signora, ci dispiace - el me dis l’impiegaa -
Lei non è viva... giace... Se nò, è da dimostrà!”

Svelta ‘me ona legora, ecco, voo in Comun,
sto in fila ‘me ona pegora cont el numer trentun;
leggi el certificaa e son tutta contenta
de podé dimostrà che son propi viventa.

Adess spetti ancamò che riva la pension...
Anca se mangi nò, son viva! Che emozion!