Quand anmò el ciel l'è scur

In la cà silenziosa
del silenzi special,
quand anmò el ciel l’è scur
de la nott de Natal,
domà el nost cicciorà
con besbili legger
e la nostra ansietà
che la cress man a man.

“El banbin l’è rivaa!
Saltee sù, tosanett!”
el diseva el papà
a nun tré anmò in del lett.

Poeu el derviva la porta
de la “sala mangè”
e nun trè, senza vos,
cont i oeucc sbarattaa,
lì, dennanz ai belée,
sotta el pin pien de lus.

Hinn di flash de la ment,
quasi quasi sbiavii,
ma in del coeur el profumm
de quell’alber d’on temp
l’è restaa dent de mì.
El progress l’ha cambiaa
in la plastica, i pin
che lusisen incoeu
d’or, d’argent e de spray.

Mì hoo compraa on alber ver
per aveggh l’illusion
de tornà indrée nel temp
con la stessa emozion.

Ma in la cà silenziosa
del silenzi special,
quand anmò el ciel l’è scur
de la nott de Natal.
e del dì se comincia
a vedè on quaj barlumm,
coloraa i pacchettitt,
pien de lacrim i oeucc,
senti pù quel profumm.