De la terrazza, lassù a San Martin,
la pianta grassa su righ de celest,
ondad che se strascen per vinc i scoeuj,
garbuj de s’ciuma domà immaginaa.

Indepertì a scoltà...

I foeuj di oliv paren ballà legger
de contentezza, dopo el temporal,
el brilla el sô in del tocchellin de mar
quasi nascost fra i piant innamoraa.
E domà lù el te carezza la pell,
con carezz dolz che te paren cattiv.

Indepertì a sentì...

Adess el mar el se ripett adasi,
per compagnà i movenz di foeuj d’argent,
con tenerezza i ond basen i sass,
a la magîa del ciel, tremenn i venn.
Se intorbidiss la ment de nostalgia,
quasi ninnada dal tò dispiasée.

Indepertì a pensà...

Ma volen via a on tratt tutti i penser,
el se ribella el coeur: felicità
voeur minga dì domà vivela in duu,
voeur dì savè gioì, amà e cantà,

anca indepertì.