Scoltà
 

El fis’cià de la pentola a pression
quasi el stremiss coi sò “esse” inscì longh
e giò de bass rifann el marciapée
cont on frecass ch’el par lingua todesca.

De là di mur che hinn inscì legger,
de vess ormai senza riservatezza,
‘na sposa, drée a lustrà el paviment,
forsi la canta, ma la senti nò.

L’era inscì bell, ‘na volta,
podè scoltà el “cricch cracch”
quell de la scoa de melga
in sul tappée del salottin quell bon!

L’è el mes de marz, ma sari sù i finester,
el baccaneri el riva fina chì,
i claxon bisios e prepotent
fan inrabì la ment.

E poeu me metti quietta a riposà
sti oss tropp stracch, sti orecc contaminaa
E a on tratt.... cipp, cipp.... el riva dal camin
(gh’hoo la fortuna de viv de sotta al tecc)
 

cipp, cipp, cipp, ciapp: passeritt rissios,
penna imparaa a sta sù
su i sciampettitt legger
giamò tacchen a lit, hinn prepotent!

“El vermisoeu l’è mè, fatt pussée in là,
ti che te see nanca bon de volà!”
“Cipp, cipp, cipp, cipp.... Fatt in là tì, villan,
ghe seri prima mì!”

E a on tratt.... cipp, ciapp: la vos l’è pussée forta,
cipp, cipp, cipp, ciapp, pussée violent el son:
dò mader hinn rivaa
a difend la soa niada.

E mì la scolti, senza pù penser,
tutta sta dolza musica d’orchestra
che incoeu la me regala la natura,
sto alegher taccà a lit de primavera