Ch’ el sia on regal del ciel,
se mai me senti sola,
se semper son con tì?

E mì te parli insema
‘me te fudesset chì,
magari a taccà a lit.

Te basi con la ment,
te parli di tò gatt,
con lor parli de tì.

Sto ben anca coi amis
quand gh’hann bisogn de mì,
o mì de lor, magari.

“Sola”, ma se voeur dì,
se parli insema a tì,
quand gh’ è nissun con mì?

Sola voeur dì noiada,
e mì, noiada, mai
Ch’ el sia on regal del ciel?
L’ è nò malinconia
sta solitudin piena
de la toa vos che scolti

e se gh’ è nostalgia
o s’ el dolor el premm,
me pias, pussée vess sola

Nò come on’ ossession,
ma inscì, naturalment
e al regord de passion,

magari magonà,
sola, ma insema a tì,
semper tenerament.

Ma ‘na quajvolta, almen,
amor, vegnum in sogn,
fam carezzà i tò man!

Perchè domà se dormi,
te see minga con mì,
sola, senza de tì!


1997