Vita de can

Me ciami Whisky e gh’hoo appena trì ann,
sarien vintun se mì fudessi on omm,
ma sont on can

Par che sia minga de razza pregiada,
ma intelligent e davvera affettuos,
almen diseven

M’hann scernii foeura, on Natal, per duu spos
fra tutti quej d’ona bella niada,
seri orgolios!

Dent on cestin, on bel fiocch ligaa al coll,
de sotta l’alber coi ballonitt,
seri on “cadeau”.

E poeu carezz, basitt, salamelecch,
seri content quasi compagn d’on re,
in quella cà.

Ma in quella cà, on alter robb l’è rivaa,
anca lù dent in on bel cavagnoeu,
fodraa de pizz.

Quand lù el vosava al pari d’on matt,
el coccolaven strengendol al coeur,
capivi nò.

Se lù el dormiva, dovevi stà quiett,
gh’avevi pù orari de mangià,
seri d’infesc!

Poeu pù nagott, nè carezz, nè moin:
l’era pussée bell, pussée intelligent,
el sò fiolin.

Inscì ona sera, lott, lott, son scappaa,
son rivaa in cà de la sciora Maria,
m’hann pù cercaa.

La mia padrona, dess, l’è ona veggetta
abituada a viv indeperlee,
la me voeur ben.

Senza tropp vizzi, ma con tutt el sò amor,
lee la se stima, portandom in gir,
‘dess sont on scior.

La va drée a dì che ghe foo compagnia,
el podarà forsi vess anca vera:
lee l’è sincera.

Ma se podessi digh la verità,
se la podess comprend i mè paroll!
Ma sont on can.

Ghe disaria quell che lee l’è per mì,
quell che ogni dì propi lee la me dà
domà a mì.

Son bon nò de parlà, de famm capì,
ma adess son pù on can cont on padron:
dess son “Quajvun”!