Votà l'è un dover

Ma savii che in Inghilterra
on barbon el dev votà?
Questa chì l’è propi bella
Già, ma el certificaa?

Nò, l’è nò ‘na barzelletta!
Sta notizia on poo strana
l’hoo sentida in la TV
propi l’altra settimana.

La mancanza de matton,
cioè d’on tecc e d’ona cà,
la poeu minga impedì
al barbon de andà a votà.

Inscì l’ha faa sta pensada
el cervell fin d’on Ingles:
dopo studi l’ha decis
che on barbon el va avvisaa

Ecco, allora, ognun de lor
l’è costrett a dichiarà
indoe el gh’ha l’abitazion,
indoe el va a dormì e mangià.
 

La panchetta d’on giardin:
quella verda o quella gialda?
Qual el numer del basell
sott’al pont, la sul Tamigi?

El barbon el gh’ha on dover:
dichiarà l’abitazion,
on canton o ona panchetta,
quella lì l’è la soa cà!

Come ogni cittadin
d’on paes che se rispetta,
rivarà de lù el postin
a portà el certificaa.

L’è che a mì me ciappa on dubbi
ma poeu minga, donca, dass
che al barbon, per la soa cà,
a ghe tocca pagà i tass?