20 marz 1929

On venter imprestaa e discussion,
parer ch’hinn a favor, parer contrari
per on fiolin ch’el nass…

Disen i dotti che tutti i fiolitt
tusscoss lor capissen, prima de nass,
e allora hoo immaginaa…

Ho immaginaa regord ch’hinn minga mè,
penser, ragionament e sensazion
che, par, abbia provaa.

Ninnada cont amor, nel venter cald,
morbida cunna, nid de tenerezza,
volevi minga nass.

E per trì dì, mì hoo davvera spettaa
forsi per ritardà la delusion
de daggh al mè papà.

Allora gh’eren nò i ecografii
e lù, purtropp, el spettava on mas’cett
e mì seri on dispett.

Ma se rifletti ben con la reson,
forsi capissi sto ritard vorsuu,
quel travaj de trì dì.

Vorevi nass propi el vintun de marz,
volevi comincià sta bella vita
insèma cont i fior.

Giamò testarda, volevi spettà,
senza pensà al patì de la mamma,
a l’ansia del papà.

Ma son nassuda el vint d’on marz ormai lontan,
el dì ch’el venn prima de primavera:
i fior nassen doman.

Hinn domà sogn, poden nò vess regord,
voré spettà fin quand nassen i fior,
e perd on dì d’amor,

l’amor pussée grand de tutta la vita,
l’amor che poeu m’hann daa i mè genitor,
perché in quel dì, per lor,

come on anticip de la primavera,
l’era sbocciaa el fior pussée prezios
e seri mì, quel fior.

 20 marzo 2001