|
|
Bosinada de voeuna nassuda de
marz
Dess tacchi
a scriv, ma l'è nò 'na poesia:
m'è vegnuu in ment de mett in rima, a un tratt,
on quaj penser. Che sia filosofia,
oppur on gioeugh del mè cervell tutt matt?
L'è facil provocà la commozion
cont i paroll "dolor" e "nostalgia",
o robb che poeu te fan vegnì el magon,
incoeu mì voeri scriv in allegria!
Ma nò, hoo sbagliaa a parlà de legria!
vorevi dì che l'è on divertiment,
on cascià via la monotonia,
con leggerezza, trattà i argoment.
Hinn minga robb de rid
o barzellett,
on quaj penser l'è perfina profond,
magari minga mè, ma a ben riflett,
a quell che pensi mì, el corrispond.
Hinn di consili
senza presunzion,
per fà la vitta pussée colorada:
daggh importanza ad ogni emozion,
che, se pur piccola, la va apprezzada.
Gh'hoo on poo de
temp a mia disposizion?
El saria util fà on cert laorà
che forsi el me daria soddisfazion!
Ma mì el foo nò, preferissi...... pensà.
Quand on quajcoss
me piasaria ottegnì,
inutil l'è girà per vii travers,
l'è mej vess ciar e schiett, demm a trà a mì,
se nò, mia cara gent, t'hee giamò pers!
Se vun el gh'ha la
creatività,
ma el gh'ha paura di alter parer,
el dev per forza a voeuna rinuncià,
el dev scernì col cervell consilier.
E propi per quest'ultima
sentenza,
me son permissa de scriv quell che hoo scritt;
l'è nò che mì son piena de sapienza:
me pias sbalordì, l'è forsi un delitt?
marzo 1999
|