Fotografii, canzon, on quaj savor
regord d’on temp passaa e nostalgia,
on poo de nostalgia, appena, appena
‘me ona farfalla, lee la vola via.

Ma quand sto sentiment el s’cioppa foeura,
in d’on mes’cioss de dolor e dolcezza
e vampad de regord ‘me ona carezza
amarament te blandissen el coeur,

l’è quand me par de ritroà l’odor
anzi el profumm che tanto el me piaseva
in di negozzi de cartoleria:
incioster, cart e gomm per cancellà..

Adess scriv pù nissun, adess se "chatta"
se fann messaggi sui telefonitt
e carta e biro ai supermercaa
e l’Olivetti senza gomma bleu.

Inscì ogni volta che poeudi trovà
on quaj cartèe che l’ha nò saraa sù,
voo in del negozzi quasi per usmà
e ritroà quel profum de la ment

E cerchi quel profum domà per mì
anca s’el coeur el piang de nostalgia:
veggh l’illusion de tornà indrée nel temp,
sarà su i oeucc, magari per patì

Eppur la carta, i lapis gh’hinn anmò.
Perché mì senti pù l’odor d’allora,
quand seri ona tosetta, tanti ann fa
e in la cartoleria gh’era el papà?