A mì me pias andà in sul mercaa,
con pocch danée te compret catanaj,
o addirittura di vestii usaa ;
mì foo i affari e desmenteghi i guaj.

Me pias spend i danée,quest chì l’è vera,
e propi quest l’è el mè divertiment,
ma andà al mercaa l’è anca ona manera
de ben scoltà i discors de la gent.

Sicchè anca stamattina sont andada
in quell de via Segneri, al Giambellin:
hoo nò compraa, però me son fermada
a scoltà on discors tutt in meneghin

Denanz a ona banchetta de verdura
doe par che regalaven i articiocch,
in coa dedrée de mì, senza premura,
do donn parlaven inscì pressapocch:

-Ma l’ha sentii che quand s’cioppa el domila,
per ona bestia inventada quest’ann,
bisogna veggh incà ‘na quaj candila,
perché la portarà tanto malann?-

-Mì hoo sentii dì che sta bestiascia grama
La suga su i noster rubinett
e de sicur el sarà un bel drama:
“Come faremm, in cà, a tegnì nett?”

-Possibil che ona bestia indeperlée
In tutt el mond, la ferma i ascensor,
la poda fa tutt quant sto gibilée,
in barba a tutti quanti i professor?-

-E sann perfina el nomm: Bagh l’hann ciamada,
l’è ‘me ona bissa mai vista e cattiva,
in d’on computer la sta rintanada,
a l’ultim de l’ann la se farà viva!-

Par che la cambia anca i cunt in banca;
siccome mì son già rivada a l’oss,
eh, sì hoo spenduu fin l’ultima palanca!
Speremm che la me metta sù on quajcoss!-

La coa per i articiocch l’era finida,
toccava a mì, ma mì gh’hoo lassaa el post,
perché me seri propi divertida,
come a teater, però de quej tost.

                                                         dicembre 1999