Grazie

El savevi giamò
che me voreven ben,
che sola seri nò:
el coeur l'era seren.

Gh'avevi nò bisogn
de tutto 'sto sconquass
vivuu come in d'on sogn:
de lor se poeu fidass!

Seri giamò sicura
de vess nò bandonada
in de la mia tortura:
l'è bell vess coccolada!

El m'ha dit on dottor
ch'el coeur l'era tropp gross,
l'ha sbagliaa, l'era amor
che l'ha renduu commoss!

L'amor ch'el m'è rivaa
a compensà el dolor:
el "negher" l'ha lustraa
de tanti bei color.

Me pias specificà:
l'è brutt de dì "parent":
fradej, sorell, cugnaa
amis e conoscent.

Magari sgangheraa,
cervell d'ona tosetta
quell ch'el m'ha faa pensà
che l'era nò disdetta:

che pèna la vareva
de strascià via el mè ren
per conferma felice
de tutt el voster ben!

dicembre 2004