San Novo

Appontament domenica mattina
coi noster bici tutt lustraa a dover,
pista ciclabil de là del Navili
piena de fopp fina a trì o quattr’ann fa.

Corsich, Trezzan, i ultim cà de Gaggian,
traversom on stradon e l’è sorpresa:
magia de verd ‘pena foeura Milan,
riser, cassin, vol d’usej de padù.

On sentiroeu costeggiaa d’acqua ciara
e, in fond, San Novo, de Zibid frazion,
dedrée on cancell, on’insolita cà
e on fazzolett de foss cont i anedott.

El mur a quader ‘m’el gioeugh de la dama
e taccaa su catanaj d’ogni sorta
in d’on mes’cioss de “kitsch” e fantasia:
l’abitazion di spos de la mia fiaba.

Pan e panscetta  cont i so sottasée,
cocumer fresch cattaa apposta per mì,
vol de colomb candid come la nev,
ridad e vinell ross in compagnia.

L’era el vottcent, o appena des ann fa?
San Novo, on paes, o sol quella cà?
Chissà se sol per mì l’era poesia
quell’antiquariaa de periferia?

Incoeu hoo savuu ch’hann faa su tanti cà,
liberaa el mur de tutti i catanaj,
la sposa la m’ha dii tutta contenta
che andarann prest in di cà popolar…

Distrutta in d’on moment la mia teoria:
de viv el present, senza nostalgia:
per nò patì, andarò pù a San Novo,
voeuri nò piang denanz a on mur sbiancaa.

 Novembre 2004